شاورما الدجاج السورية + صوص الثومية

شاورما فراخ سوري + صوص الثومية

للي بيحب شاورما الفراخ السوري، لو مشيتو بالطريقة دي صح هاتديكو احلى شاورمة فراخ سوري ونفس الطعم واحلى من برا بكتيييير

مواضيع أخرى حول طريقة اعداد الشوارما

شاورما مع خبز الشوارمة

طريقة عمل وصفة شاورما دجاج

المقادير:

كيلو فراخ الدجاج مخلي ومتقطع شرائح رفيعة عليه : كوبيتين زبادي 80 جم +نص كوب حليب (بيدي طراوة حلوة اوى أكثر من الذبادي) +ملعقة كبيرة سماق+6 فصوص ثوم كبيرة مطحونة+عصير ليمونتين+ ملح+بهارات هانطحنها عبارة عن :ثلاث حبات حبهان من غير القشرة +5مسمار قرنفل+ 8 حبات كبابة صيني+ربع ملعقة قرفة مطحونة +ملعقة صغيرة بابريكا

الطريقة :

هانجيب الثوم والبهارات والزبادي وبقيت الحاجة من غير الفراخ ونقلبهم في طبق كويس وبعد كدا نحط الفراخ او الدجاج عليها ونسيبها في التتبيلة مش أقل من أربع ساعات ،
لما نيجي نساويها لازم ناخد بالنا اوى من طريقة التسوية علشان تبقى مشوية مش مطبوخة، لأنه مش عاوزينها تنزل ميتها،وهي كالتالي : 

هانجيب طاسة تيفال كبيرة ونسخنها ونجيب ملعقة صغيرة زبدة واول ماتدوب نحط شوية فراخ قد كبشة كدا مش كتير علشان احنا عاوزنها تشوى مش تتطبخ لأنه لو حاطينا الفراخ كتير ومرة واحدة هاتنزل مايتها وهاتبقي طعمها مش مظبوط، ونفضل نقلب فيها لحد ماتحمر مش هاتخد وقت ،ونطلعها ونمسح الطاسة بمنديل ورق ونشيل كل الحاجات المحروقة ونكرر العملية تاني لحد مانخلص الكمية كلها.

نيجي لتومية :

انا بعملها بالنشا والمية ويتطلع بالظبط زي بتاعت برا ،الطريقة الاصلية بالزلال بس مش مضمون أنه يفضل ماسك معاكى وبعد كدا فكرة البيض الني مش ظريفة....

الطريقة :

هانجيب كوب ونص مية عليه ملعقتين نشأ وملعقتين أو ثلاثة خل على حسب حموضة خل ونحطه على النار و نقلب لحد مايتقل ،بعد مايبرد احطه في الخلاط أو ال هاند بليندر وأضيف تلت كوب زيت وست فصوص ثوم (دول فصوص صغيرة مش كبيرة ،طبعا لو كبيرة نقلل شوية وانتم قدرو الكمية البي تيحبوها ) وملح واضرب لحد مايتحول لمستحلب لونه ابيض وطبعا نذوق في الاخر ونشوف محتاج ملح أو شوية حموضة ممكن نضيف ملح اليمون، (وفي ملحوظة لو النشا من النوع اللي بيتقل كويس يبقى نحط ملعقتين على كل كوبايتن مية) لأنه النشا بيبقى أنواع وأحيانا بحالات

وطبعا ماننساش نعمل مخلل الخيار ومش هاياخد وقت نقطع ونحط الملح والخل ونديه غلوة على النار ونطفي ونغطيه ونسيبه ، ونحطه في الساندويتش لأنه بيفرق
في الطعم لو عاوزين شاورمة سوري بجد ،وممكن طبعا بطاطس معاه في الساندويتش متحمرة، وبعد مالفينا الساندويتش نحاول ندهنه بزيت بالفرشة ونحطه يتحمص شوية في الساندويتش ميكر أو في طاسة تيفال من الناحيتين 
وبالهنا والشفا

بالنسبة للعيش الصاج

 ممكن بتعمل في البيت زي ماعملته أو تشترو جاهز من محلات الشاورما أو نستخدم العييش الشامي الأبيض بيبقبى 

طريقة عيش الصاج:

 كل ثلاث كوبايات دقيق عليهم ملعقة صغيرة خميرة وملعقة كبيرة سكر،وربع ملح وملعقتين زيت وكوب ماء تقريبا ونعجنهم كويس وبعد كدا ونسيبهم نص ساعة وننقسمهم كور متساوية وناخد واحدة واحدة ونفردها بشوية زيت خفيف ونكون مسخنين طاسة واسعة تيفال على البوتجاز نحطها أو مالقيها عملت فقاقيع واحمرت سنة من تحت اقلبها على الناحية التانية ،ونطلعها ونغطيها على طول بفوطة علشان متنشفش 

ملاحضة :

-كمية الخميرة هنا قليلة على الثلاث كوبايات الفكرة لما جربتها بالخميرة بحسها اطرى، والطعم احلى ،ومش بتتطلع تخينة ،وممكن طبعا تعمليها من غيرها وانا كنت بعملها من غير خميرة في الأول .

-طريقة عمل شاورما الدجاج السورية

-الشاورما اللحمة ليها بهارات شبه اللي هنا بس فيه اختلافات ،في حد والله طلبها و لسة منزلتهاش هانزلهالكم إن شاء الله،انا نزلت طريقة البرجر البيتي النهاردة

-فتة الشاورما بصي ،اولا الفراخ اللي هانستخدمها فيها هي بنفس الطريقة اللي عاملاها،بعد كدا بالنسبة للرز ،انا بفضل اي فته تتعمل بالرز العادي وهي طبعا المطاعم في مصر بيستخدمو رز بسمتي ،ودا بيرجع انك تحبي انهى نوع ،طريقته إعملي الرز بزبدة وحطي شوية كركم عليها ورشة قرفة بسيطة وعود أو اثنين بالكثير قرنفل،وطبعا ممكن تعمليه ابيض،بالنسبة الصوص ممكن تعملي زي اللي عملته وبعد كدا تحطيله شوية طحينة وتخفيفي بمية ،أو عاوزا حاجة بسيطة كوب زبادي عليه ملعقة طحينة وتوم وممكن تحطي مايونيز والملح وليمون ،العيش وبتستخدمي هنا العيش اللبناني الرقيق ، بيتقطع مكعبات وتحمريه في زبدة ياسمنة أو زيت زيتون أو زيت عادي ،بتجيبي الطبق وترصي فيه العيش وفوقه الرز وتحطي الصوص والشاورما ،زهرة الربيع

-الكبابة الصيني نوع من البهار العطري ،شبه الفلفل الأسود بس أكبر منه ،وليه رائحة أقرب إلى جوزة الطيب بس خفيفية

-السماق نوع من البهار لوني محمر على فوشيا أو بني محمر ،وطعمه حامض